حشر ہوتا ہے یہی خام تمناؤں کا

 حشر ہوتا ہے یہی خام تمناؤں کا 

جلد سیلاب اُتر جاتا ہے دریاؤں کا

قہر برسا ہے کہ برسات میں برسا بادل 

رابطہ ٹُوٹ گیا شہر سے ہر گاؤں کا 

ہم پہ ہی ظلم ہمارا ہی دیا کھاتے ہیں 

کوئی چارہ تو کرو آج کے آقاؤں کا

زندگی! تُو بھی بڑی گھور منافق نکلی 

دُھوپ میں رکھا سدا، وعدہ کیا چھاؤں کا 

ساری دنیا ہی نظر آتی ہے مدفن مجھ کو  

جب نکلتا ہے جنازہ مِری آشاؤں کا

ہم نصیبوں کو مشقت سے بدل دیتے ہیں 

منہ نہیں تکتے کبھی ہاتھ کی ریکھاؤں  کا

ساز! بس چند قدم پر ہے گُلستانِ اُمید 

ہم سفر کاٹ چکے یاس کے صحراؤں کا

ساز دہلوی