کہنے کو تو ارباب حرم جاگ رہے ہیں

 کہنے کو تو اربابِ حرم جاگ رہے ہیں

لیکن وہ تو سوئے ہیں صنم جاگ رہے ہیں

محلوں میں بھی اربابِ حشم جاگ رہے ہیں

ڈر ان کو یہ ہے اہلِ قلم جاگ رہے ہیں

افسانہ شبِ ہجر کے ماروں کا نہ پوچھو

تاروں کو بھی نیند آ گئی ہم جاگ رہے ہیں

سنتا نہیں کوئی بھی مِرا نالۂ شب گیر

کہنے کو تو اربابِ کرم جاگ رہے ہیں

حیرت سے میں یہ رنگِ جہاں دیکھ رہا ہوں

سوئے ہیں عرب، اہلِ عجم جاگ رہے ہیں

دامانِ شبِ غم دُرِ نایاب سے پُر ہے

عاشق تِرے بادیدۂ نم جاگ رہے ہیں

کیا لطف تہجد میں تجھے آئے گا آخر

صوفی تِرے سینے میں صنم جاگ رہے ہیں

نیند آئے گی کیا تختۂ گل پر تجھے فطرت

سینے میں مِرے داغِ الم جاگ رہے ہیں

فطرت بھٹکلی

محمد حسین فطرت