دن ڈھل گیا خوشی کا شب غم سوار ہے

 دن ڈھل گیا خوشی کا شبِ غم سوار ہے

میں بھی کہوں کہ دل مِرا کیوں بے قرار ہے

گل ہائے رنگا رنگ ہیں دل میں کھلے ہوئے

ہر پھول پر گماں ہے ہوا شعلہ بار ہے

سنتے ہیں ان کے ہاتھ قلم کر دئیے گئے

محنت سے جن کی دیس میں رنگِ بہار ہے

لمحہ بہ لمحہ ذہن پہ حاوی ہے اس کی سوچ

چھائی ہوئی نگاہ میں تصویرِ یار ہے

الطاف سارے وصل کے اغیار لے گئے

ہم سے کہا کہ ہجر بڑا شاندار ہے

جاں وارنے سے ان پہ کریں گے نہ ہم گریز

الفت نئی نئی ہے، جواں اعتبار ہے

احباب پر خلوص ہیں جس کے جہان میں

سردار بھی وہی ہے، وہی مالدار ہے

صبحِ ازل ملے تھے ملیں گے بروزِ حشر

ثابت ہوا کہ پیار بڑا پائیدار ہے

حاجت حکیم کی نہ کوئی چاہیے دوا

اکسیر تیرا غم ہے، اگر غمگسار ہے

احمد کرو معاف بڑائی اسی میں ہے

بدلے کا بھی اگرچہ تمہیں اختیار ہے

شکیل احمد