مسیحا ہم اسی لمحے تمہارے غم سے نکلیں گے

 مسیحا ہم اسی لمحے تمہارے غم سے نکلیں گے

ہمارے زخم جونہی خواہشِ مرہم سے نکلیں گے

کسی دن ہم نکل جائیں گے بے محور خلاؤں میں

کسی دن ہم زمیں کی گردشِ پیہم سے نکلیں گے

عجب کیا ہے مسیحا کی سماعت کو لہو کر دیں

وہ کچھ نغمے جو دل کے درد کی سرگم سے نکلیں گے

کروں گا زیبِ تن کب تک عدوئے جان کی اُترن

اور اس کے پیرہن کب تک مِرے پرچم سے نکلیں گے

ابھی تو ہم کسی کی بزمِ نازِ دل سے نکلے ہیں

کسی دن ہم کسی کے دیدۂ پُرنم سے نکلیں گے

رہے گا یوں اگر سلطان تلواروں کے سائے میں

ہمارے شہر کیسے خوف کے عالم سے نکلیں گے

جنوں کے غم کے اس انبار میں شامل تو ہونے دو

ہزاروں قہقہے عادل صفِ ماتم سے نکلیں گے

شہزاد عادل