ازل سے محو تماشائے یار ہم بھی ہیں

 عارفانہ کلام حمد نعت منقبت

ازل سے محوِ تماشائے یار ہم بھی ہیں

جمالِ شاہِ اُممﷺ پر نثار ہم بھی ہیں

نظر جو اُنؐ کی ہوئی ہم خزاں نصیبوں پر

تو پھر کہیں گے کہ رشکِ بہار ہم بھی ہیں

اس ایک بات پہ ہے فخر ہم غریبوں کو

کہ اُنؐ کے اُمتیوں میں شمار ہم بھی ہیں

یہ اُس کریمؐ کا در ہے کہ تاجدار جہاں

پکارتے ہیں کہ اُمیدوار ہم بھی ہیں

صبا سے کہ دو کہ جالی کو چُومنے کے لیے

بس ایک تُو ہی نہیں، بے قرار ہم بھی ہیں

جو پُل صراط پہ ہم پر بھی پڑ گئی وہ نظر

تو پھر نصیر! سمجھ لو کہ پار ہم بھی ہیں

سید نصیرالدین نصیر