اے دین حق کے رہبر تم پر سلام ہر دم

 عارفانہ کلام حمد نعت منقبت

اے دینِ حق کے رہبر تمؐ پر سلام ہر دم​

میرے شفیعِ محشرﷺ تمؐ پر سلام ہر دم​

اِس بے کس و حزیں پر جو کچھ گزر رہی ہے​

ظاہر ہے سب وہ تمؐ پر، تمؐ پر سلام ہر دم​

دنیا و آخرت میں جب میں رہوں سلامت​

پیارے پڑھوں نہ کیوں کر تمؐ پر سلام ہر دم

​دل تفتگانِ فرقت پیاسے ہیں مدتوں سے​

ہم کو بھی جامِ کوثر، تمؐ پر سلام ہر دم​

بندہ تمہارےؐ در کا آفت میں مبتلا ہے​

رحم اے حبیبِؐ داور! تمؐ پر سلام ہر دم​

بے وارثوں کے وارث بے والیوں کے والی​

تسکینِ جانِ مُضطر، تمؐ پر سلام ہر دم​

لِلہ، اب ہماری فریاد کو پہنچیۓ​

بے حد ہے حال اَبتر تمُ پر سلام ہر دم​

جلادِ نفسِ بد سے دیجے مجھے رِہائی​

اب ہے گلے پہ خنجر تمُ پر سلام ہر دم​

دریوزہ گر ہوں میں بھی ادنیٰ سا اُس گلی کا​

لطف و کرم ہو مجھ پر تمُ پر سلام ہر دم​

کوئی نہیں ہے میرا میں کس سے داد چاہوں​

سلطانِ بندہ پرور، تمُ پر سلام ہر دم​

غم کی گھٹائیں گھر کر آئی ہیں ہر طرف سے​

اے مہر ذرّہ پرور، تمُ پر سلام ہر دم​

بُلوا کے اپنے در پر اب مجھ کو دیجے عزت​

پھرتا ہوں خوار در در، تمُ پر سلام ہر دم​

محتاج سے تمہارے سب کرتے ہیں کنارا​

بس اک تمہیں ہو یاور، تمُ پر سلام ہر دم​

بہرِ خدا بچاؤ اِن خار ہائے غم سے​

اک دل ہے لاکھ نشتر تمُ پر سلام ہر دم​

کوئی نہیں ہمارا ہم کس کے در پہ جائیں​

اے بے کسوں کے یاور تمُ پر سلام ہر دم​

کیا خوف مجھ کو پیارے نارِ جحیم سے ہو​

تم ہو شفیعِﷺ محشر، تمُ پر سلام ہر دم​

اپنے گدائے در کی لیجے خبر خدارا​

کیجے کرم حسن پر، تمُ پر سلام ہر دم​

حسن رضا بریلوی