گلزار مدینہ صل علیٰ رحمت کی گھٹا سبحان اللہ

 عارفانہ کلام حمد نعت منقبت

گلزارِ مدینہ صلِ علیٰ، رحمت کی گھٹا سبحان اللہ

پُر نُور فضا ماشااللہ،۔ پُر کیف ہوا سبحان اللہ

اُس زلفِ معنبر کو چُھو کر مہکاتی ہوئی، اِتراتی ہوئی

لائی ہے پیامِ تازہ کوئی،۔ آئی ہے صبا سبحان اللہ

والشمس جمالِ ہوش ربا،۔ زلفیں وَالیلِ اِذا یَغشٰی

القابِ سیادت قرآں میں، یٰسیں، طٰحہٰ سبحان اللہ

معراج کی رات حضرتؐ کا سفر افلاک کی رونق سر تا سر

مہتاب کی صورت روشن ہے نقشِ کفِ پا، سبحان اللہ

جب بہرِ شفاعت محشر میں سرکارؐ کا شہرہ عام ہُوا

اک لہر خوشی کی دوڑ گئی، اُمت نے کہا؛ سبحان اللہ

ہونٹوں پہ تبسم کی موجیں، ہاتھوں میں لئے جامِ رحمت

کوثر کے کنارے وہ اُنﷺ کا، اندازِ عطا سبحان اللہ

آنکھیں روشن، پُر نُور نظر، دل نعرہ زناں، جاں رقص کناں

تاثیرِ دعا اللہ، اللہ، پھر اُنﷺ کی دعا سبحان اللہ

بُو بکرؓ کا حسنِ صدقِ بیاں،۔ عدلِ عُمرؓ آئینِ قُرآں

عثمانِؓ غنی میں رنگِ حیا، حیدرؑ کی سخا سبحان اللہ

کہنے کو تو نعتیں سب نے کہیں، یہ نعت نصیر آفاقی ہے

کتھے مہر علیؒ کتھے تیری ثنا، کیا خوب کہا؛ سبحان اللہ

سید نصیرالدین نصیر