سو بسو تذکرے اے میر امم تیرے ہیں

 عارفانہ کلام حمد نعت منقبت

سو بسو تذکرے اے میرِؐ امم تیرےﷺ ہیں​

اوجِ قوسین پہ ضو ریز علم تیرےﷺ ہیں​

وقت اور فاصلے کو بھی تری رحمت ہے محیط​

سب زمانے تِرے، موجود و عدم تیرےﷺ ہیں​

جیسے تارے ہوں سرِ کاہکشاں جلوہ فشاں​

عرصۂ زیست میں یوں نقشِ قدم تیرےﷺ ہیں

​اہلِ فتنہ کا تعلّق نہیں تجھ سے کوئی​

قافلے خیر کے اے خیر شِیَم تیرےﷺ ہیں​

ہیں تِریﷺ ذات پہ سو ناز گنہ گاروں کو​

کیسے بے ساختہ کہتے ہیں کہ ہم تیرےﷺ ہیں​

ہم کو مطلوب نہیں مال و منالِ ہستی​

ہم طلبگار فقط تیری قسم تیرےﷺ ہیں​

ناز بردارئ دنیا کی مشقّت میں نہ ڈال​

ہم کہ پروردۂ صد ناز و نعم تیرےﷺ ہیں​

ان کی خوشبو سے مہک جائے مشامِ عالم​

میرے دامن میں جو گلہائے کرم تیرےﷺ ہیں​

حفیظ تائب

٭خیر شِیَم؛ اچھی خصلت، اچھی عادت والا