بدن میں موجۂ خوشبوئے عود ٹھہرا ہے

 عارفانہ کلام حمد نعت منقبت سلام

بدن میں موجۂ خوشبوئے عود ٹھہرا ہے

زباں کا جب سے وظیفہ، درود ٹھہرا ہے

درودِ پاکﷺ کا دل بیعتی ہوا جب سے

ہنر میں اک ملکوتی سرور ٹھہرا ہے

رچی ہے خون میں ’صلِّ علیٰ‘ کی سرشاری

رگوں میں نشۂ جذبِ درودﷺ ٹھہرا ہے

سلام گنبدِ خضرا کو جھک کے کرتا رہے

اس آرزو میں سِپہرِ کبُود ٹھہرا ہے

خیال و خواب میں رُخ جانبِ نبیؐ ہے ریاض

خوشا، وجود ہی جب سے درود ٹھہرا ہے

ریاض مجید