تصدق تیری گلیوں کے مدینہ یاد آتا ہے

 عارفانہ کلام حمد نعت منقبت

تصدق تیری گلیوں کے مدینہ یاد آتا ہے

جھکاٸے سر کو پھرنا عاجزانہ یاد آتا ہے

بِتاٸے گنبدِ خضرا کے سائے میں وہ سارے پل

نبیﷺ کے شہر میں گزرا زمانہ یاد آتا ہے

حرم کو چُومتی نظریں ہوں کعبہ کی زیارت ہو

عرب کی سر زمیں کا ہر نگینہ یاد آتا ہے

علیؑ اور فاطمہؑ حسنینؑ آقاﷺ کے دُلارے سب

وہ اہلِ بیتؑ کا طیب گھرانہ یاد آتا ہے

نہ پھر گونجا مضافاتِ مدینہ میں وہ سوزِ حبش

اذان عشق دینے کا قرینہ یاد آتا ہے

مِنارِ عشق کی منزل ہے عاشق سیّدِ ابرارﷺ

وہ قرنیؒ، عشق میں ڈوبا دِوانہ یاد آتا ہے

تجھے مسعودہ مل جائے نجف کی خاک مَلنے کو

اُترتا قلب پر تیرے سکینہ یاد آتا ہے

مسعودہ ریاض