بے قید زندگی پر تعزیر چاہتا ہوں

 بے قید زندگی پر تعزیر چاہتا ہوں

ہر پائے بُوالہوس میں زنجیر چاہتا ہوں

دل تیرگی کا مرکز آنکھیں ہیں شب گزیدہ

ظلمت کدوں میں جشنِ تنویر چاہتا ہوں

سب کچھ لُٹا دیا ہے جس آرزو کی خاطر

اس خواب کی میں اپنے تعبیر چاہتا ہوں

سچ بولنے کی میں نے پھر ڈال دی روایت

اب شہر شہر اس کی تشہیر چاہتا ہوں

خم جو سروں کو کر دے جو جیت لے دلوں کو

وہ تیغ چاہتا ہوں،۔ وہ تیر چاہتا ہوں

اِک چاند بن کے چمکے جو وقت کی جبیں پر

تیرہ شبی میں ایسی تحریر چاہتا ہوں

دنیا عزیز مجھ سے بس اس لیے خفا ہے

میں ربِ دو جہاں کی تکبیر چاہتا ہوں

عزیز احمد بگھروی