وسعت پذیر حلقۂ دامان نعت ہے

 عارفانہ کلام حمد نعت منقبت

وسعت پذیر حلقۂ دامانِ نعت ہے

"ہر شعبۂ حیات میں امکانِ نعت ہے"

ہر شاخ رونقِ چمنستانِ نعت ہے

دو جگ میں خُوشبوئے گُلِ ریحانِ نعت ہے

قرآن سے کشید مضامین نعت کے

رُوحِ ثناء یہی ہے یہی جانِ نعت ہے

سیرت سے مُشکبار ہو سُنت سے مستنیر

یعنی ہو مُستند یہی شایانِ نعت ہے

اللہ کی یہ پیاری، فرشتوں کی لاڈلی

سبحانہٗ تعالی عجب شانِ نعت ہے

والشمس ہے کہیں، کہیں واللیل سے خطاب

یہ لؤ لؤِ صلوۃ، وہ مرجانِ نعت ہے

ما زاغ کا سلام ہے، قوسین کا درود

معراج ان کی شان میں اعلانِ نعت ہے

مُدَّثِّرُ و مُبَشِّرُ و مُزَّمِّلُ ہیں آپﷺ

ہر نامِ نامی آپؐ کا، عنوانِ نعت ہے

ہر عہد کو محیط وہی عہد خُوشگوار

خیرُ القرون نیرِ تابانِ نعت ہے

حکمِ تُعَزِّ رُوہٗ ادب گاہ مصطفیٰﷺ

لا تَرْفَعُوا عقیدہ و ایمانِ نعت ہے

لولاک کیا ہے مدحتِ سرورؐ کے باب میں

اللہ کی محبت و بُرہانِ نعت ہے

عقدہ کشا ہے آیتِ صَلُّوا وَسَلِّمُوا

بے شک درودِ پاکؐ بھی فرمانِ نعت ہے

یُعْطِیْکَ رَبّکَ سے تونگر بشر بشر

الفقر فَخْرِی رزقِ گدایانِ نعت ہے

پیماں شبِ الست کا لا شک ذالک

قُربان جائیے کہ وہ پیمانِ نعت ہے

تحتِ سری سے عرش بریں تک کے سلسلے

جس سے مہک رہے ہیں وہ لوبانِ نعت ہے

اے شہسوارِ دشتِ غزل ہوش میں تو ہے

نادان! احتیاط یہ میدانِ نعت ہے

حقِ ثناء ہو کس سے ادا اور کس طرح

سب خاک اس سفر میں وہ کیوانِ نعت ہے

مجھ سا حقیر آپؐ کو نذرانہ دے تو کیا

کر لیجیے قبول یہ دِیوانِ نعت ہے

یہ شہرت و مقام یہ سطوت یہ ننگ و نام

میری بساط کیا ہے یہ فیضانِ نعت ہے

محشر میں اطمینان سے ہوں گے ہم اُمتی

حاصل ہمیں شفاعتِ جانانِ نعت ہے

جذب و شعور و فکر و فن و خامہ و ہُنر

کاشر ہر ایک شے مِری قُربانِ نعت ہے

شوزیب کاشر