محمد کے ساتھی پہ قربان جاؤں

 عارفانہ کلام حمد نعت منقبت

محمدﷺ کے ساتھی پہ قربان جاؤں

میں تیمی قریشی پہ قربان جاؤں 

حسب اور نسب جس نے بے عیب پایا 

وہ جس نے محمدﷺ پہ سب کچھ لُٹایا

وہ جو زخم کھا کر سدا مُسکرایا

میں ایسے صحابی پہ قربان جاؤں

وہ لب کھولے تو مُسکرائے صداقت

وہ جب سر اُٹھائے تو جُھک جائے رفعت

سلام اس کو کرتی ہے ہر ایک عظمت

میں اُس عالی ہستی پہ قربان جاؤں

یہ کہتے ہیں اب تک کے سارے وثائق

ہے بعد از پیمبرﷺ وہی سب سے فائق

غلاموں کو آزاد کرنے کا شائق 

میں اس کی نوابی پہ قربان جاؤں

جو چُھپ چُھپ کے کرتا تھا بوڑھی کی خدمت

جو چھوٹوں بڑوں، سب کو دیتا تھا عزت

ہے قربان اس پر جہاں بھر کی اُلفت

میں اس سُچے موتی پہ قربان جاؤں

مصعب شاہین