ہے مری بیوی ذرا بیمار باقی ٹھیک ہے

 زعفرانی کلام

ہے مِری بیوی ذرا بیمار باقی ٹھیک ہے

اور بچہ ہے ذرا لاچار باقی ٹھیک ہے

خُسر ہے میرا بڑا مکار باقی ٹھیک ہے

اور تھوڑی ساس ہے ہُشیار باقی ٹھیک ہے

چھے مِرے سالے ہیں اور وہ بھی ذرا سے بد قماش

لوگ کہتے ہیں انہیں عیّار باقی ٹھیک ہے

ایک بیٹا ہے کہ جو چرسی بھی ہے اور بھنگڑی

دوسرا ہے بس ذرا مے خوار باقی ٹھیک ہے

یہ بھی اپنے آپ کو افسر بتاتا تھا مگر

نکلا یہ داماد بھی کُمہار باقی ٹھیک ہے

سانس کا ہے بس مرض اور کچھ ہے دل کا عارضہ

ٹُوٹتی ہے کچھ مِری گُفتار باقی ٹھیک ہے

یوں تو عزت ہے نہیں رُسوائیوں کا ڈر مجھے

بس ذرا بدنام ہے کردار باقی ٹھیک ہے

بس یہی اک عیب کہ کرتہ ہے اور کالر نہیں

اور چھوٹی ہے ذرا شلوار باقی ٹھیک ہے

پیٹ میں لُقمہ نہیں ہے، جسم پہ چادر نہیں

اور اس پر عید کا تہوار باقی ٹھیک ہے

نیب والوں نے کیا ہے احتساب ایسا مِرا

چھین لی ہے بنگلہ کوٹھی کار باقی ٹھیک ہے

اب مجھے رب سے شکایت ہے نہ شکوہ ہے کوئی

رحمتوں کی ہے نظر درکار باقی ٹھیک ہے

جمال عبدالناصر