ٹوٹے ہوئے دلوں کی اجازت نہیں ملی

 ٹُوٹے ہوئے دِلوں کی اِجازت نہیں مِلی

ہم کو بڑے گھروں کی محبت نہیں ملی

آسائشیں تو دشت کی ساری ملیں مجھے

آوارگی میں قیس کی وحشت نہیں ملی

کیسے تجھے بتاتی کہاں رہ گئی تھی میں

اک لمحہ تیری یاد سے فُرصت نہیں ملی

کچھ وقت تو گُزار ہی لیتا ہے ہر کوئی

ہم کو تو خیر اتنی بھی مہلت نہیں ملی

اس کے علاوہ کچھ بھی سمجھ میں نہ آ سکا

فطرت نہیں ملی، کہیں قسمت نہیں ملی

تجدید قیصر