کسی کی یاد مرے دل میں اس طرح آئی

 کسی کی یاد مِرے دل میں اس طرح آئی

بجی ہو جیسے کسی غم کدے میں شہنائی

تمام عُمر فراموش ہی رہی ہم سے

بوقتِ مرگ مگر زندگی کی یاد آئی

بڑے خلوص سے اپنے ہی خون کی پوشاک

تمہارے خنجرِ عُریاں کو ہم نے پہنائی

کسی کا ساتھ گوارا ہُوا نہ قسمت کو

مِرے نصیب میں لِکھی ہوئی تھی تنہائی

سفر کے وقت یہ آواز کِس نے دی ہم کو

ہمارے پاؤں میں زنجیر کِس نے پہنائی

جلا لیا جو دِیا دل کا ہم نے اے روشن

اسی دِیے سے زمانے نے روشنی پائی

روشن لال روشن