بلائے جاں سہی پر زندگی اتنی بھیانک بھی نہیں

 یُوں بھی ہوتا ہے

یُوں بھی ہوتا ہے کہ اکثر

زندگانی کے اُفق پر

بدلیاں غم کی یکایک

یُوں اُمڈ آتی ہیں جیسے

زندگی کی آخری یہ شام ہو

چھُوٹنے لگتی ہیں نبضیں

ڈُوبنے لگتا ہے دل

اور یُوں لگتا ہے جیسے

ہو نہ پائے گی سحر اس شام کی

اور پھر ناگاہ

اک بے نام غُنچے کے چٹکنے سے

یا اک معصُوم بچے کے تبسّم سے

طلسمِ تیرگی کا ہفت پیکر

ٹُوٹ جاتا ہے

اُبھر آتے ہیں پھر سے

آسماں پر چاند اور تارے

قیامت خیز لہروں کا تلاطم

ڈُوب جاتا ہے

بلائے جاں سہی پر

زندگی اتنی بھیانک بھی نہیں

نور احمد شیخ