دیار دل میں کہیں دوست کا پتا نہ ملا

دیارِ دل میں کہیں دوست کا پتا نہ ملا

وہ بدنصیب ہوں کعبے میں بھی خدا نہ ملا

شریکِ قید تھے جذباتِ دل، مگر بے کار

قفس تھا ایسا کہ نالوں کو راستا نہ ملا

متاعِِ عشق کا ہو دل کے بعد کیا سودا

کہ گمشدہ کا بھروسا نہیں، ملا نہ ملا

یہ کس نے غمکدۂ دنیا کا نام رکھا ہے

ہمیں تو کوئی یہاں درد آشنا نہ ملا

میں امتحاں کدۂ دہر سے اٹھا جب سے

خبر نہیں مگر اتنی کہ دوسرا نہ ملا

ثاقب لکھنوی