چھن کے آتی ہے جو یہ روشنی دروازے سے

چھَن کے آتی ہے جو یہ روشنی دروازے سے 

کیا مجھے دیکھ رہا ہے کوئی دروازے سے

گھر کی تختی سے ملا آج مجھے اپنا پتہ 

اپنے ہونے کی گواہی ملی دروازے سے

میں نے دیلیز سے جانے کی اجازت لے لی 

پھر مِری بات نہ طے ہو سکی دروازے سے

ایک روزن میں پڑی آنکھ سے کھلنے لگے ہیں 

ایک دیوار کے اندر کئی دروازے سے

رات بھر سسکیاں لیتا ہے کوئی شخص یہاں 

کبھی دیوار سے لگ کر کبھی دروازے سے

خالی کمرہ مِرا کس چاپ سے بھر جاتا ہے 

آتا جاتا ہی نہیں جب کوئی دروازے سے

تُو نے مہتاب نکلتے ہوئے دیکھا ہے کبھی 

اور مہتاب بھی ایسے کسی دروازے سے

اشرف یوسفی