کتنے خوش ہیں مری پناہ میں سانپ

کتنے خوش ہیں مِری پناہ میں سانپ 

خواب میں سانپ خوابگاہ میں سانپ

اب ہمیں زہر بھی نہیں ملتا

ڈھونڈتے پھر رہے ہیں راہ میں سانپ

عشق نے ڈس لیا ہے زہری کو 

مر رہا ہے کسی کی چاہ میں سانپ

کتنا آباد یہ خرابہ ہے 

ہر طرف ہیں دلِ تباہ میں سانپ

راہ کے پیچ و خم پہ لکھا تھا 

سرسرانے لگے نگاہ میں سانپ

آستیں سے نکل کے آیا تھا 

چھپ گیا ہے مِری کلاہ میں سانپ

دشمنوں کی تجھے ضرورت کیا 

کم نہیں ہیں تِری سپاہ میں سانپ

مار ڈالوں کہ چھوڑ دوں فیصلؔ 

سانپ اور دل کی بارگاہ میں سانپ 

فیصل عجمی