ہر قدم پر مجھے لغزش کا گماں ہوتا ہے

 ہر قدم پر مجھے لغزش کا گماں ہوتا ہے

چشمِ ساقی کی نوازش کا گماں ہوتا ہے

لطفِ پیہم نہ سہی جورِ مسلسل ہی سہی

ہر توجہ پہ نوازش کا گماں ہوتا ہے

ان کے آگے لبِ اظہار پہ ہے مہرِ سکوت

ایک خاموش پرستش کا گماں ہوتا ہے

صرف تم دل کی تباہی کا سبب کیا ہوتے

بختِ ناساز کی سازش کا گماں ہوتا ہے

بات یہ کیا ہے عروج انکی ہر اک بات میں آج

اپنی ہر طرز گزارش کا گماں ہوتا ہے

عروج زیدی بدایونی