مجھے ایک نظم لکھنی ہے
ان آنکھوں کے لیے
جو سپنے چھِن جانے کے بعد
سُولی چڑھائی گئی ہیں
مجھے ایک نظم لکھنی ہے
مقدس اجسام کے لیے
جو غربت سے شکست کھا کر
ذِلتوں کے ہاتھ بکتے ہیں
مجھے ایک نظم لکھنی ہے
ان خواہشوں کے نام
جو گناہ کے عفریت سے ڈر کر
کھِلنے سے پہلے کمہلا جاتی ہیں
مجھے ایک نظم لکھنی ہے
جوانوں کے نام
جن کے ارادے اور ولولے
خودکشی کر کے مر گئے ہیں
مجھے ایک نظم لکھنی ہے
اس فریاد کی خاطر
جو ثبوت نہ ہونے کے باعث
قابلِ شنوائی نہیں رہی
مجھے ایک نظم لکھنی ہے
ایک صحافی کے لیے
جس نے ایک سچی خبر
شراب کی بوتل میں ڈبو دی
مجھے ایک نظم لکھنی ہے
ان زبانوں کے نام
جن کو مذہبی سوداگروں نے
خودکش حملے میں مار دیا
مجھے ایک نظم لکھنی ہے
ان مزدوروں کے نام
جو دن بھر دھوپ میں جل کر
بے بسی خرید لاتے ہیں
مجھے ایک نظم لکھنی ہے
ان ہونٹوں پر
جن کی دہلیز پر الفاظ
سر پٹک کر مر جاتے ہیں
مجھے ایک نظم لکھنی ہے
اس جج کے لیے
جس نے ضمانت کی قیمت لگا کر
قاتل کو رہائی کا حکم دیا
مجھے ایک نظم لکھنی ہے
انتظار کے لمحوں کے لیے
جو گھر کی چوکھٹ پر بیٹھے بیٹھے
سُوکھ کر بکھر جاتے ہیں
مجھے ایک نظم لکھنی ہے
دوستی کے لیے
جو فریب کے تحائف میں
سانس گھٹنے سے مر گئی ہے
مجھے ایک نظم لکھنی ہے
بے ربط سی باتوں کے لیے
جو تیرے سامنے افسردہ ہیں
اور اپنی ٹوٹی ہوئی قلم پر
عابد عباس کاظمی
No comments:
Post a Comment