خوشی کی انتہا افسردگی ہے

 خوشی کی انتہا افسردگی ہے

بلا کی تیز پا افسردگی ہے

یہی اندوختہ ہے عمر بھر کا

انوکھی سی عطا افسردگی ہے 

یہاں مت آ یہاں بھی کیا دھرا ہے

یہاں بھی بے بہا افسردگی ہے

نہیں کہتے وہ کہہ دینے کی باتیں

نہیں کھلتا کہ کیا افسردگی ہے 

بظاہر انبساط آگیں تبسم

بباطن پر کشا افسردگی ہے

دل افسردہ تیری دلدہی کو

مقابل دلربا افسردگی ہے 

تبسم اور تبسم کے عقب میں 

بڑی قاتل ادا افسردگی ہے  

فراوانی سے بکھرائی گئی ہے 

جہاں میں جا بجا افسردگی ہے 

جدھر جس جا نظر کیجے عبیرہ

وہیں چہرہ نما افسردگی  ہے

عبیرہ احمد