شمع دل شمع تمنا نہ جلا مان بھی جا

 شمعِ دل، شمعِ تمنا نہ جلا، مان بھی جا

تیز آندھی ہے مخالف ہے ہوا مان بھی جا

ایسی دنیا میں جنوں ایسے زمانے میں وفا

اس طرح خود کو تماشا نہ بنا مان بھی جا

کب تلک ساتھ تِرا دیں گے یہ دھندلے سائے

دیکھ نادان نہ بن ہوش میں آ مان بھی جا

زندگی میں ابھی خوشیاں بھی ہیں رعنائی بھی

زندگی سے ابھی دامن نہ چھڑا مان بھی جا

شہر پھر شہر ہے یاں جی تو بہل جاتا ہے

شہر کو چھوڑ کے صحرا کو نہ جا مان بھی جا

شہریار خان