تمہاری بے حسی ہے اور تم ہو

 تمہاری بے حِسی ہے اور تم ہو

میری دیوانگی ہے اور میں ہوں

کسی کروٹ نہیں آرام جی کو

عجب اک کھلبلی ہے اور میں ہوں

مسلسل اب در و دیوار جاں سے

اداسی جھانکتی ہے اور میں ہوں

وہی سب کچھ ہے لیکن تم نہیں ہو

وہی کھِڑکی کُھلی ہے اور میں ہوں

تمہاری یاد مجھ سے کھو گئی تھی

مگر پھر مل گئی ہے اور میں ہوں

میں غیروں کو بھلا کیسے بتاؤں

یہ قصہ خانگی ہے اور میں ہوں

خدا کی آنکھ سے تکتا ہوں دنیا

یہ دنیا لُٹ رہی ہے اور میں ہوں

تھی یادوں کی جو اک قندیل روشن

وہ کب کی بُجھ چکی ہے اور میں ہوں

مرزا رضی الرحمٰن