احوال غم ذات سنانے سے رہا میں

 احوالِ غمِ ذات سنانے سے رہا میں

اب خود کو تماشا تو بنانے سے رہا میں

ہر بار میں تذلیلِ انا کر نہیں سکتا

ہر بار اسے جا کے منانے سے رہا میں

احسان کا مفہوم ہے آنکھیں نہ ملانا

احسان کسی کا بھی اٹھانے سے رہا میں

ممکن ہے کسی روز یہی اکسیر بنا دے

اس دل میں لگی آگ بجھانے سے رہا میں

جو زخم رفیقوں کے رویے سے لگے ہیں

وہ زخم کسی کو بھی دِکھانے سے رہا میں

دریا ہوں تو دریا ہی اسے پیش کروں گا

پیاسے کو، سمندر تو پلانے سے رہا میں

فیض عالم بابر