تیری جستجو میں جہاں دیکھ آئے

تیری جستجو میں جہاں دیکھ آئے

کہاں دیکھنا تھا کہاں دیکھ آئے

چلے صبح دم، شام گھر لوٹ آئے

زمیں آسماں کہکشاں دیکھ آئے

رہے رہگزر پر کھڑے شام تک ہم

گزرتے رہے کارواں دیکھ آئے

قدم دیکھنا خود یہ چومیں گی موجیں

زمیں بوس ہم آسماں دیکھ آئے

نہ موسم نہ باد صبا راس آئی

چمن میں تھا رقص خزاں دیکھ آئے

ہر اک شہر دیکھا پتہ جا کے پوچھا

جدھر بھی گئے کچھ دھواں دیکھ آئے

گلے مل کے دیکھا ہے روتی فضائیں

چمن آشیاں باغباں دیکھ آئے

شفیق ندوی