کبھی جو بیت جاتے ہیں زمانے یاد آتے ہیں

 کبھی جو بیت جاتے ہیں زمانے یاد آتے ہیں

پرانے دور کے قصے سُہانے یاد آتے ہیں

کبھی ہم کو سُلانے کو وہ ماں لوری سناتی تھی

ہمیں اب بھی وہ میٹھے سے ترانے یاد آتے ہیں

جہاں بچپن کبھی بیتا مِرے بابل! تِرا انگنا

سبھی کے سنگ ہسنے اور ہنسانے یاد آتے ہیں

سکھی جو سنگ کھیلی تھی مِری پکی سہیلی تھی

سہیلی وہ کہیں بچھڑی زمانے یاد آتے ہیں

وہ ساون جھوم کر آنا وہ مل کر سیر کو جانا

وہ برساتوں میں بھیگے ہم دِوانے یاد آتے ہیں

مِرے استاد وہ پیارے وہ ان کی شفقتیں ساری

سبق ان کے سکھائے سب پرانے یاد آتے ہیں

شرارت جو کبھی کی تھی وہ گڑیاؤں کی شادی بھی

کسی شادی پہ گائے تھے جو گانے یاد آتے ہیں

مِرا وہ ڈائری لکھنا وہ پہلی شاعری لکھنا

وہ دل سے جو کبھی لکھے فسانے یاد آتے ہیں

حمیرا! کھو گیا بچپن نہ بابا ہیں نہ وہ گلشن

تھے ہم نادان وہ سارے سیانے یاد آتے ہیں

حمیرا قریشی