لکھوں قلم سے تو طیبہ لکھائی دیتا ہے

 عارفانہ کلام حمد نعت منقبت

لِکھوں قلم سے تو طیبہ لکھائی دیتا ہے

سُنوں تو صرف مدینہ سنائی دیتا ہے

زمیں پہ ایک جگہ رشکِ آسماں ہے اور

جہاں سے نور کا قریہ دکھائی دیتا ہے

یہیں سے مجھ کو شفا ملتی ہے زمانے میں

یہ اسم میرے مرض کو دوائی دیتا ہے

بہت سنبھل کے چلا جاتا ہے یہاں دیکھو

یہ ایک راستہ ہے جو بھلائی دیتا ہے

میں اک نگاہِ کرم کا ہوں ملتجی کب سے

وہ جانے کب مجھے در کی گدائی دیتا ہے

یہ تجربہ ہے مِری زیست کا، مجھے اشعر

درودِ پاکﷺ غموں سے رہائی دیتا ہے

مرتضیٰ اشعر