عارفانہ کلام حمد نعت منقبت
مہکے ہوئے گلاب کی صورت کِھلا ہوا
نامِ نبیﷺ ہے نُورِ خدا سے دُھلا ہوا
کیوں نہ کریں نثار شہ دیںﷺ پہ جان و دل
ہم عاصیوں پہ ہے درِ جنت کُھلا ہوا
سہمے ہوئے بشر کو ملی آپﷺ سے زباں
کھولا ہے آپﷺ نے لبِ انساں سِلا ہوا
دو نیم چاند کو کیا انگشتِ پاک سے
واپس بلایا آپﷺ نے سورج ڈھلا ہوا
سردارِ انبیاءﷺ تِری بعثت کے فیض سے
جینے کا نا اُمیدوں کو اک حوصلہ ہوا
زاہد! میں آج بانٹتا پھرتا ہوں ہر طرف
مجھ کو درِ نبیﷺ سے ہے اتنا مِلا ہوا
زاہد شمسی
No comments:
Post a Comment