آتا ہے جب بھی لفظ محمد اذان میں

عارفانہ کلام حمد نعت منقبت

آتا ہے جب بھی لفظِ محمدﷺ اذان میں

میلاد ہونے لگتا ہے دل کے مکان میں

صورت کی اُنؐ کے سیرت و کردار کی کہیں

ملتی نہیں مثال کسی بھی جہان میں

حضرت حلیمہ آپ کی گودی کے لعل سا

دھرتی پہ تھا نہ کوئی کہیں آسمان میں

عشقِ رسولِؐ ہاشمی کی ہے یہ بھی عطا

نعتیں سُنوں تو شہد ٹپکتا ہے کان میں

خواہش ہے مسجدِ نبیؐ میں بیٹھ کر کبھی

لکھتا رہوں قصیدے میں آقاؐ کی شان میں

اِک عاشقِ رسولؐ کا بس یہ علاج ہے

ہو ذکر اُنؐ کا جان پھر آتی ہے جان میں

اشعر درودﷺ اور ثنا کے طفیل ہی

تاثیر آ گئی ہے ہماری زبان میں

مرتضیٰ اشعر