ناکام ہو کے رہ گئی ہر احتیاط دل

 ناکام ہو کے رہ گئی ہر احتیاطِ دل

اک ہی نظر نے الٹ کے رکھ دی بساطِ دل

جیسے جگا کے نیند سے لُوٹے کوئی متاع

کچھ اس طرح اس آنکھ نے کی وارداتِ دل

اچھے نہیں ہیں ان دنوں موسم کے ذائقے

ہم سے کوئی نہ پوچھے ہمارے حالاتِ دل

ہر تیرگی کو تُو نے اُجالے عطا کیے

مولا کرم کہ بُجھ رہی ہے کائناتِ دل

ساقی کی کرامات سے زندہ ہے زندگی

جامِ شرابِ درد سے باقی ثباتِ دل

اپنے لیے ہے ان کی وہی، سرسری نظر

غیروں کے واسطے ہیں سبھی التفاتِ دل

آبِ وضو ہے خونِ تمنا و آرزو

دم دم خیالِ یار ہے، سانول صلوٰۃِ دل

سانول حیدری