حُسن کیا کیا مُسکرایا عشق کے انداز پر
نغمۂ غم جب بھی چھیڑا ہم نے دل کے ساز پر
خار زار زندگی کو بھی بنا دیتا ہے خُلد
کیوں نہ ہم ایمان لائیں عشق کے اعجاز پر
تیری اپنی ذات میں مضمر ہے حُسن لم یزل
کس لیے سجدے پہ سجدہ جلوہ گاہ ناز پر
جلوہ فرما کون مہر و ماہ کے پردے میں ہے
رقص کرتا ہے نظام دہر کس کے ساز پر
بال و پر سے کب کوئی پہنچا فراز عرش تک
یہ سعادت منحصر ہے ہمت پرواز پر
آ گئی صحن چمن میں فصل گل تو کیا ہوا
ہیں وہی غم کے ترانے زندگی کے ساز پر
راز الفت غیر سے کہنا ہے ننگ عاشقی
ناز تھا منصور کو کیوں انکشافِ راز پر
عشق کی قسمت میں ہوتے ہیں صلیب و دار بھی
شاد اے صابر! نہ ہو تُو لذتِ آغاز پر
صابر ابوہری
No comments:
Post a Comment