ہزار اہلِ جنوں حلقہ رسن میں رہے

ہزار اہلِ جنوں حلقۂ رسن میں رہے

مگر خیالِ پرستارئ چمن میں رہے

تِرے خیال کے احساں رہیں گے یاد ہمیں

جس انجمن میں رہے تیری انجمن میں رہے

گیا نہ قیدِ قفس میں بھی بانکپن اپنا

اسی طرح سے رہے جس طرح چمن میں رہے

وہ خار جن سےگزرتے ہیں لوگ بچ بچ کر 

بہار بن کے وہی میرے پیرہن میں رہے

تمام رات گزاری خیالِ خوباں میں 

تمام رات ستاروں کی انجمن میں رہے

کچھ اس طرح سے رہو روحِ گلستاں بن کر 

تمہارے بعد تمہاری مہک چمن میں رہے

یہ اختلاف نہ ہو میکشوں میں اے ساقی

نئی شراب اگر ساغرِ کہن میں رہے

شمیم جے پوری