ناز بھی ہوتا رہے ہوتی رہے بیداد بھی

ناز بھی ہوتا رہے  ہوتی رہے بے داد بھی

سب گوارا ہے جو تم سنتے رہو فریاد بھی

ایک آفت ہیں حسینانِ ستم ایجاد بھی

کرتے ہیں بیداد مجھ پر چاہتے ہیں داد بھی

وقت پڑتا ہے تو کوئی آشنا ہوتا نہیں

دشمنِ فرہاد نکلا تیشۂ فرہاد بھی

آہ بھرنا تو تجھے خوب آ گیا اے حباب

سیکھ لے ہم دل دکھوں سے نالہ و فریاد بھی

تم جو کہتے ہو بگڑ کر ہم نہ آئیں گے کبھی

یہ بھی کہہ دو اب نہ آئے گی ہماری یاد بھی

میں جو تڑپا سامنے اس کے تو خوش ہو کر کہا

ہاں مِرے سر کی قسم اس دم ذرا فریاد بھی

زلف کھولے آئے ہیں قیدی بنانے کے لیے

قید آنکھوں پر، مگر جب ہو کوئی معیاد بھی

ہائے کیا حسرت کدہ تھا دل ہمارا اے جلیلؔ

ہو گیا دو روز میں آباد بھی، برباد بھی

جلیل مانکپوری