غم کی فضا میں برسر تدبیر کون ہے

عارفانہ کلام منقبت سلام مرثیہ

غم کی فضا میں بر سرِ تدبیر کون ہے 

مجبوریوں میں گھر کے ہمہ گیر کون ہے

یہ کس نے دی اذان سرِ دشتِ کربلا 

سجدے میں زیرِ سایۂ شمشیر کون ہے

اس شان سے یہ کس کا نکالا گیا جلوس 

یہ پا برہنہ بستۂ زنجیر کون ہے

کس نے جہانِ خفتہ کو بیدار کر دیا 

دینِ نبیؐ کے خواب کی تعبیر کون ہے

اس دھوپ چھاؤں کا تو کوئی تجزیہ کرے

بدبخت کون، صاحبِ تقدیر کون ہے

وقفِ نظر ہے حادثۂ کربلا شہابؔ

خود سوچئے کہ لائقِ تعزیر کون ہے

شہاب دہلوی