کشیدہ سر ہوئے کچھ لوگ قامتوں کے بغیر
ہم آسماں ہیں تہِ آب وسعتوں کے بغیر
سگانِ قریہ تہِ شاخِ ماہِ نوحہ کناں
گھروں میں خَلق تہِ آسماں چھتوں کے بغیر
سحر کے خوف سے یوں بند ہیں مکاں اپنے
چٹانیں رات کے ساحل پہ صورتوں کے بغیر
یہ آدمی ہیں کہ روتے درخت جنگل میں
ہر ایک زخم نمایاں،۔ علامتوں کے بغیر
تجھے بھی اے غمِ جاں! کم ملیں گے ہم ایسے
متاعِ درد سمیٹی،۔ ضرورتوں کے بغیر
وہ ایک لفظ عطا ہو سمجھ سکوں جس کو
وہ اک جہانِ معانی،۔ نہایتوں کے بغیر
پڑھو، تمہارے لیے ہی شجر سے اترا ہے
ورق ورق یہ صحیفہ، عبارتوں کے بغیر
تمہیں ہر اک سے شکایت سہی مگر توصیف
بتاؤ! جی بھی سکو گے،۔ محبتوں کے بغیر
ڈاکٹر توصیف تبسم
No comments:
Post a Comment