یوں تو محروم نوا کب سے دہن میرا تھا

یوں تو محرومِ نوا کب سے دہن میرا تھا

پھر بھی چرچا ہوا جس کا وہ سخن میرا تھا

میں نے کس نشۂ نخوت میں کماں کھینچی تھی

تیر جس جسم میں اترا وہ بدن میرا تھا

تُو کبھی غور سے دیکھ اپنی قبائے ریشم

تیرے خلعت میں کوئی تارِ کفن میرا تھا

اب تو مجھ کو بھی ندامت ہے وفا پر اپنی

مختلف کتنا زمانے سے چلن میرا تھا

آخری شامِ خزاں ٹوٹ کے یاد آتی ہے

پھر نشیمن ہی مِرا تھا نہ چمن میرا تھا

میری آنکھوں نے جو دیکھا مِرے لب پر آیا

میری تقصیر ہی بے ساختہ پن میرا تھا

تھی افق تا بہ افق یوں تو مِری خاک فرازؔ

کس قدر تنگ مگر مجھ پہ وطن میرا تھا 

احمد فراز