جس نے درِ وحشت کیا وا دشتِ جنوں میں
اس نے مجھے زنجیر کیا دشتِ جنوں میں
سب ارض و سما بھرنے لگے چاپ سے اپنی
کیا لگتی تھی قدموں کی صدا دشتِ جنوں میں
کھل جاتا کبھی سر تو چلی آتی تِری یاد
رکھ جاتی مِرے سر پہ ردا دشتِ جنوں میں
اک نقشِ عبادت نے کیا ایسا چراغاں
ہر گام پہ جلتا تھا دِیا دشتِ جنوں میں
اس نے تو بچھائے تھے بہت خار سرِِ راہ
کیا تم سے کہیں رنگِ حنا دشتِ جنوں میں
ہو کرنے میں شہروں کو تھے مشہور بہت تم
بدنام ہوا وہ جو مِٹا دشتِ جنوں میں
کس کس سے کہیں گھر کی طلب ہم کو نہیں تھی
یہ کیا ہے جو آباد کیا دشتِ جنوں میں
شہناز نبی
No comments:
Post a Comment