جاں یوں لباس جسم کو نکلی اتار کر

 جاں یوں لباسِ جسم کو نکلی اُتار کر

جیسے کوئی سرائے میں اک شب گُزار کر

حالات نے لباس تو میلا کیا، مگر

کردار پھر بھی رکھا ہے ہم نے سنوار کر

گر ہو سکے تو دے انہیں اُمید کی کرن

بیٹھے ہوں زندگانی سے اپنی جو ہار کر

یہ بھی تو ہے انا کو کُچلنے کا ایک طور

نفرت رہی ہے جس سے اسی کو تو پیار کر

جو زخم دشمنوں سے ملے ان کو تو نہ دیکھ

جو دوستوں نے بخشے ہیں ان کا شمار کر

امید روز ایک نئی لے کے جاگیے

ناکامیوں کے بوجھ کو سر سے اُتار کر

ہر کوئی آنسوؤں کی زباں جانتا نہیں

آنکھیں کسی کے سامنے مت آبشار کر

اپنے نہیں تو اور کسی کے لیے بھی جی

خالد روش اک ایسی بھی اب اختیار کر

قیصر خالد