اس آنکھ میں اک اشک بھی دیکھا نہیں جاتا

 اس آنکھ میں اک اشک بھی دیکھا نہیں جاتا

اور حالِ دلِ زار بھی پوچھا نہیں جاتا

میں جس کے لیے راہ میں بیٹھی ہوں مِرے دل

وہ شخص کسی بزم میں تنہا نہیں جاتا

آ تجھ کو ملا دوں میں چراغوں سے ہوا اب

غم مجھ سے تِرا اور یہ دیکھا نہیں جاتا

یہ آب و ہوا بھی تو مسافر کی طرح ہیں

منزل کو کبھی چھوڑ کے رستہ نہیں جاتا

اے شہر کی گلیوں میں مجھے ڈھونڈنے والو

اب گھر سے کسی سمت بھی نکلا نہیں جاتا

تب تک کے لیے ہم بھی پہیلی کی طرح ہیں

جب تک کہ ہمیں ٹھیک سے سمجھا نہیں جاتا

زہرا یہ مِری عمر ہواؤں کی طرح ہے

جتنا بھی اسے روک لو روکا نہیں جاتا

زہرا بتول