محترم جب سے وہ سنگ آستاں ہونے لگا

 محترم جب سے وہ سنگِ آستاں ہونے لگا

ماسوا اس کے ہر اک سجدہ گراں ہونے لگا

ترجمانِ دل بنے ہیں جب سے اپنے خد و خال

ذکرِ جاناں داستاں در داستاں ہونے لگا

کیا کریں جانِ وفا شعر و سخن کی گفتگو

ہر سخن بے ذائقہ، حرفِ زباں ہونے لگا

جوں ہی دیکھی صبح دم تعبیرِ خوابِ آئینہ

چہرۂ گل آتشیں یکدم دھواں ہونے لگا

آئینہ در آئینہ جمتی گئی گردِ ملال

عکس اس کا چشمِ حیرت پر گراں ہونے لگا

چاٹتی ہے روز و شب سوچوں کی دیمک یہ بدن

دھیرے دھیرے منہدم اپنا مکاں ہونے لگا

پھر سے اب ترتیب دینا ہے نصابِ زندگی

ہر قدم پر اب تو اپنا امتحاں ہونے لگا

پوری دنیا پر ہے قبضہ جانے کس آسیب کا

ملکوں ملکوں رقصِ مرگِ ناگہاں ہونے لگا

کب سے آوارہ وطن ہے سوختہ جسموں کی راکھ

اے زمیں اب آسماں بھی نوحہ خواں ہونے لگا

کب تلک ڈستی رہے گی یہ بلائے بے اماں

قلب میں پیوست تیرِ بے نشاں ہونے لگا

یہ وبا چاٹے گی کتنے اور اس گلشن کے پھول

اپنےہونے سے بھی دل اب بدگماں ہونے لگا

جب طبیبِ وقت سے پوچھا مرض کا کچھ علاج

اس کی جانب سے جواباً ایں و آں ہونے لگا

کِبر و نخوت کی زرہ رہتا تھا جو اوڑھے ہوئے

رفتہ رفتہ جسم وہ مثلِ کماں ہونے لگا

جیسے جیسے مال و دولت کی ہوس بڑھتی گئی

ویسے ویسے کم خلوصِ دوستاں ہونے لگا

اُس کا ذکرِ دلنشیں جب سے ہُوا جُزوِ بیاں

معتبر خسرو! مِرا طرزِ بیاں ہونے لگا

فیروز ناطق خسرو