اب بھی اک دست جنوں چاک گریبان تو ہے

 اب بھی اک دستِ جنوں چاکِ گریبان تو ہے

تیرے اس شہر میں یوں جینے کا ارمان تو ہے

سانس لینے کی سکت ہم میں ابھی باقی ہے

کچھ لٹانے کے لیے اب بھی مِری جان تو ہے

کب بچھڑ کر یوں جیا کرتے ہیں ہارے ہوئے لوگ

دیکھنا ہم میں کوئی دوسرا انسان تو ہے

ہجر کے لمحوں سے شعلوں کو صدا ہے شاید

وصل سے دور سہی دل میں تِرا دھیان تو ہے

اب سرِ دار درخشاں ہیں جگر کے سب داغ

اے چراغِ سحری! صبح کا امکان تو ہے

یوں قدم میرے بہک جاتے ہیں تیری جانب

جیسے اب بھی یہی رستہ مجھے آسان تو ہے

وحشتِ جاں کے بھی با وصف یہی ہے عامر

چاک کرنے کو مِرا اپنا گریبان تو ہے

عامر یوسف