اپنی گزری نہ کسی حال بھی آرام کے ساتھ

 اپنی گزری نہ کسی حال بھی آرام کے ساتھ

خود بھی گردش میں رہے گردشِ ایام کے ساتھ

بادہ نوشی ہو بڑے چین سے آرام کے ساتھ

چشمِ ساقی بھی جو گردش میں رہے جام کے ساتھ

ہم تِری زُلف گِرہ گیر سے کُھل کھیلیں گے

عمر گزری ہے ہماری قفس و دام کے ساتھ

تیرگی جتنی بڑھی، اُتنے ہی چمکے آنسو

روشنی میرے چراغوں کی بڑھی شام کے ساتھ

وہ مِرا دل تھا یہ مے خانے کا دل ہے ظالم

محتسب مان بھی جا ظلم نہ کر جام کے ساتھ

میری رُسوائی میں ناداں! تِری رُسوائی ہے

نام تِرا بھی عبارت ہے میرے نام کے ساتھ

یہ الگ بات کہ محرومِ نظارہ تھی نظر

اِک تعلق تو رہا تیرے در و بام کے ساتھ

یہ کرم کم ہے کہ وہ یاد کریں تجھ کو نصیر

پیار سے اب ہو تِرا ذکر، کہ دُشنام کے ساتھ

سید نصیرالدین نصیر