یہ وہ دن نہیں کہ لبان سرخ کی بات ہو

 یہ وہ دن نہیں کہ لبانِ سُرخ کی بات ہو

یہ وہ دن نہیں کہ طوافِ زُلف میں رات ہو

یہ وہ دن نہیں کہ غزل کا رنگ سجاؤں میں

یہ وہ دن نہیں کہ کسی کو ہنس کے بُلاؤں میں

یہ وہ دن نہیں کہ کسی خوشی کا خیال ہو

یہ وہ دن نہیں کہ مجھے کسی کا سوال ہو

یہ وہ دن ہیں جن میں اُداسیوں کا قیام ہے

یہ وہ دن ہیں جن کے طلوع میں کوئی شام ہے

میں اگر ملال میں ہوں، ملال پہ چھوڑ دے

تُو چمک دمک مجھے میرے حال پہ چھوڑ دے

تُو شریکِ غم جو نہیں تو کوئی گِلہ نہیں

یہ نصیب ہے جو کسی کو کہہ کے ملا نہیں

انہی آنسوؤں کے وضو میں بات کروں گا میں

اسی غم میں فجر کروں گا رات کروں گا میں

مجھے اِن دنوں کی اداسیوں کی قسم علی

ہے غمِ حسینؑ تو پھر نہیں کوئی غم علی

علی زریون