قتل عاشق کسی معشوق سے کچھ دور نہ تھا​

قتلِ عاشق کسی معشوق سے کچھ دور نہ تھا​

پر تِرے عہد سے آگے تو یہ دستور نہ تھا​

باوجود یہ کہ پر و بال نہ تھے آدمؑ کے​

وہاں پہنچا کہ فرشتے کا بھی مقدور نہ تھا​

رات مجلس میں تِرے حسن کے شعلے کے حضور​

شمع کے منہ پہ جو دیکھا تو کہیں نور نہ تھا​

ذکر میرا ہی وہ کرتا تھا صریحاً، لیکن​

میں جو پوچھا تو کہا خیر، یہ مذکور نہ تھا​

دردؔ کے ملنے سے اے یار بُرا کیوں مانا​

اس کو کچھ اور سوا دید کے منظور نہ تھا​

خواجہ میر درد