خدارا بخش دو اب تو

خدارا بخش دو اب تو

خدارا بخش دو اب تو
تمہاری مہربانی سے بہت کچھ سہہ لیا ہم نے
کہیں روٹی کے لالے ہیں
کہیں بجھتے اجالے ہیں
کہیں آنکھوں میں اشکِ خوں
کہیں تن من پہ چھالے ہیں

جہاں چاہت کی تھی خوشبو، وہاں بارود کی بو ہے
جہاں بستی تھیں بس خوشیاں، وہاں ماتم کی آوازیں
سہانے خواب تھے جس جا، وہاں اب وحشتیں ناچیں
سرِ بازار اب ہاۓ، ہماری خواہشیں ناچیں
نئی ہر روز ہی ہم پر، ہزاروں آفتیں ناچیں
تمہارے عہدِ شاہی میں، ہزاروں پھول ایسے ہیں
کہ مجبوری جنہیں بس اِک نوالے ہی میں بیچ آئے
بہت معصوم کلیاں تھیں
جنہیں حالات کے دھارے سرِ بازار لے آۓ
جو معمارِ وطن تھے کل، انہیں ’خود کش‘ بنا ڈالا
سنبھل سکتے تھے جو شاید، انہیں پل میں گرا ڈالا
تھے بوڑھے ناتواں کاندھے
جنہیں کچھ اور بھی تم نے ہلا ڈالا، جھکا ڈالا
اور اس پر بھی تمہیں دعویٰ؟
مسیحا ہو، سہارے ہو، کہ محسن تم ہمارے ہو؟
خدارا بخش دو اب تو
خدارا بخش دو اب تو

اشتیاق زین