بلا کی دھوپ تھی کیوں سایۂ شجر نہ کھلا

 بلا کی دھوپ تھی کیوں سایۂ شجر نہ کھُلا

غریبِ شہر کی دستک پہ کوئی در نہ کھُلا

یہ اور بات کہ اِک عمر میرے ساتھ رہا

عجب ستم ہے کہ وہ صاحبِ نظر نہ کھلا

یہ عکسِ خالِ رخِ لالہ فام شام ڈھلے

مسیحِ وقت پہ عقدہ یہ سر بسر نہ کھلا

رسائی اپنی حجاباتِ لا مکاں تک تھی

درونِ کون و مکاں بھی وہ ہمسفر نہ کھلا

یہ مانا ندرت و جدت کا ہے حسیں پیکر

مگر بیاں کا مِرے دفترِ ہنر نہ کھلا

ضیائے نقشِ کفِ پا سراغِ منزل تھا

سفر کی گرد میں یہ رازِ رہگزر نہ کھلا

خود اپنے سامنے لٹتی رہی متاعِ حیات

مجھی پہ رازِ حقیقت اے چشمِ تر نہ کھلا

فنونِ شعر کی گہرائیوں میں ڈوب کے بھی

یہ کیا ستم ہے مِرا غنچۂ ہنر نہ کھلا

ہماری خاک کو گردش میں چاک لاتا رہا

عجب ہے کیا کہ اگر دستِ کوزہ گر نہ کھلا

ضمیرِ لفظ و معانی جگا گیا لیکن

ہمارا دفتر کلفت بہ چشمِ تر نہ کھلا

میں داغ ہائے جگر سے ہجومِ ظلمت کو

شکست دے چکا پر مطلعِ سحر نہ کھلا

جبینِ شوق مظؔفر نگوں رہی میری

ہجومِ حشر میں لیکن وہ جلوہ گر نہ کھلا

مظفر احمد