بسر گئے ہو مرے ذہن سے اتر گئے ہو

 بِسر گئے ہو مِرے ذہن سے اُتر گئے ہو

بھرا پُرا تھا مکاں جس کو خالی کر گئے ہو

میں لے کے بیٹھا ہوا تھا تمہاری راہ میں پھول

نگاہ بھی نہیں کی تم نے اور گزر گئے ہو

مجھے بھی دیکھو میں آندھی گزار آیا ہوں

چلی ذرا سی ہوا، اور تم بکھر گئے ہو

میں اپنے جسم کی میت اٹھائے پھرتا ہوں

عجیب شخص ہو تم زندگی سے ڈر گئے ہو

یہ جتنا رُوپ ہے تم پر ہمارے دم سے ہے

ہمارے قرب کے جادو ہی سے نکھر گئے ہو

بس ایک خواب ہی مانگا تھا تم سے لیکن تم

کسیلے پانی کے چھینٹوں سے آنکھ بھر گئے ہو

ریاض ساغر