میں شہر ذات میں مدہوش کب تلک رہتا
سفر کی گرد میں خاموش کب تلک رہتا
خوشی کو ڈھونڈنے نکلا اُداس شہر سے دل
غموں کی بن کے یہ آغوش کب تلک رہتا
مِری سرشت کا مادہ خطا سے عاری نہیں
سو اس جہان میں نردوش کب تلک رہتا
لگا رہا تھا مسلسل وہ تہمتیں مجھ پر
میں پھر وہاں ہمہ تن گوش کب تلک رہتا
مجھے بھی ڈھونڈ لیا کائنات نے آخر
میں اپنے آپ میں روپوش کب تلک رہتا
خودی فروش نہ تھا اس لیے میں ٹوٹ گیا
نئے زمانے کی پاپوش کب تلک رہتا
جگا دیا مجھے دنیا کی اس حقیقت نے
خلیل اس کا مے نوش کب تلک رہتا
خلیل الرحمٰن خلیل
No comments:
Post a Comment